നിത്യപുരോഹിതന്റെ സന്നിധിയിലേക്ക് ഫാ. മൈക്കിള്‍

0
325

വാഴ്‌സോ: ആശുപത്രിക്കിടക്കയില്‍ ടെര്‍മിനല്‍ കാന്‍സറിനോട് മല്ലിട്ട് കിടക്കവേ ഫ്രാന്‍സിസ് മാര്‍പാപ്പയുടെ പ്രത്യേക അനുവാദത്തോടുകൂടി ഒരേ ദിവസം ഡീക്കന്‍ പട്ടവും, പൗരോഹിത്യ പട്ടവും ഒരുമിച്ചു സ്വീകരിച്ച പോളിഷ് വൈദികന്‍ ഫാ. മൈക്കിള്‍ ലോസ് നിത്യസമ്മാനത്തിന് വിളിക്കപ്പെട്ടു. സണ്‍സ് ഓഫ് ഡിവൈന്‍ പ്രോവിഡന്‍സ് സന്യാസ സമൂഹത്തിലെ അംഗമായിരുന്ന അദ്ദേഹം ഇന്ന് ഉച്ചയോടെയാണ് ദൈവസന്നിധിയിലേക്ക് യാത്രയായത്. ലോകത്തെ തന്നെ കണ്ണീരിലാഴ്ത്തിയ വൈദികന്റെ മരണ വാര്‍ത്ത കോണ്‍ഗ്രിഗേഷന്റെ ഔദ്യോഗിക ഫേസ്ബുക്ക് പേജിലൂടെയാണ് സഭാനേതൃത്വം അറിയിച്ചത്.

ഒരു മാസം മുന്‍പാണ് ലൂയിജി ഓറിയോണ്‍ മേജര്‍ സെമിനാരിയില്‍ പഠിക്കുകയായിരുന്ന ഫാ. മൈക്കിള്‍ ലോസിനു കാന്‍സര്‍ രോഗം സ്ഥിരീകരിച്ചത്. തുടര്‍ന്നു ചികിത്സക്കായി ആശുപത്രിയില്‍ പ്രവേശിപ്പിച്ചെങ്കിലും പൗരോഹിത്യ സ്വീകരണം എന്ന ഒറ്റ ആഗ്രഹം മാത്രമേ അദ്ദേഹത്തിന് ഉണ്ടായിരിന്നുള്ളൂ. വൈദിക വിദ്യാര്‍ത്ഥിയുടെ സ്വപ്നം സാക്ഷാത്കരിക്കുന്നതിനായി വാഴ്‌സോപ്രാഗ് രൂപത വത്തിക്കാന്‍ തലത്തില്‍ ഇടപെട്ടപ്പോള്‍ ഫ്രാന്‍സിസ് പാപ്പ പ്രത്യേക അനുമതി നല്‍കുകയായിരിന്നു. തുടര്‍ന്നു ഇക്കഴിഞ്ഞ മേയ് 24നു ഓങ്കോളജി വാര്‍ഡിലെ കിടക്കയില്‍വച്ച് അദ്ദേഹം ഡീക്കന്‍ പദവിയും പൗരോഹിത്യവും ഒന്നിച്ചു സ്വീകരിച്ചു.

ഇതിന് പിന്നാലെ ജൂണ്‍ ഏഴാം തീയതി അദ്ദേഹത്തിന്റെ മുപ്പത്തിയൊന്നാം പിറന്നാളിന് പോളിഷ് പ്രസിഡന്റ് ആന്‍ഡ്രസെജ് ഡൂഡ മൈക്കിള്‍ ലോസിനെ ആശുപത്രിയില്‍ നേരിട്ടു എത്തി സന്ദര്‍ശിച്ചിരുന്നു. നവ വൈദികന്റെ അനുഗ്രഹവും വാങ്ങിയാണ് പ്രസിഡന്റ് അന്ന് മടങ്ങിയത്.