ലോക്ക് ഡൗൺ: ഓട്ടോമൊബൈല്‍ മേഖലയില്‍ പ്രതിദിനം 2300 കോടി രൂപയുടെ നഷ്ടം

0
57

കൊറോണ വൈറസിന്റെ വ്യാപനം തടയുന്നതിനായി കേന്ദ്ര സര്‍ക്കാര്‍ രാജ്യം മുഴുവന്‍ 21 ദിവസത്തേക്ക് അടച്ചിടല്‍ പ്രഖ്യാപിച്ചിരിക്കുകയാണ്. ഇത് ഇന്ത്യയുടെ വ്യവസായിക മേഖലയില്‍ കനത്ത ആഘാതം സൃഷ്ടിക്കുമെന്നാണ് വിലയിരുത്തല്‍. ഓട്ടോമൊബൈല്‍ മേഖലയില്‍ മാത്രം പ്രതിദിനം 2300 കോടി രൂപയുടെ നഷ്ടമുണ്ടാകുമെന്നാണ് വാഹനനിര്‍മാതാക്കളുടെ സംഘടനയായ സിയാം അഭിപ്രായപ്പെടുന്നത്.

കൊറോണയുടെ വ്യാപനം തടയുന്നതിനായി ഇന്ത്യയിലുള്ള എല്ലാ വാഹന നിര്‍മാതാക്കളും അവരുടെ നിര്‍മാണ പ്ലാന്റുകളും ഡീലര്‍ഷിപ്പുകളും മറ്റും അടച്ചിടുന്നതായി പ്രഖ്യാപിച്ചിരുന്നു. ഇതില്‍ ഭൂരിഭാഗവും മാര്‍ച്ച് 31 വരെ മാത്രമാണ് അടച്ചിടാന്‍ തീരുമാനിച്ചിരുന്നത്. എന്നാല്‍, പ്രധാനമന്ത്രിയുടെ തീരുമാനത്തോടെ ഇത് ഏകദേശം ഏപ്രില്‍ 15 വരെ നീളുമെന്നാണ് കണക്കാക്കുന്നത്.

വാഹനങ്ങളുടെ നിര്‍മാണവും വില്‍പ്പനയും സര്‍വീസും മുടങ്ങുകയും സ്‌പെയര്‍ പാര്‍ട്‌സുകളുടെ വില്‍പ്പന കുറയുകയും ചെയ്യുന്നതില്‍ നിന്ന് പ്രതിദിനം ഏകദേശം 2300 കോടി രൂപയുടെ നഷ്ടമുണ്ടാകുമെന്നാണ് പ്രാഥമിക പഠനം തെളിയിക്കുന്നതെന്ന്  സിയാമിന്റെ പ്രസിഡന്റ് രാജന്‍ വധേര അറിയിച്ചു.

ഇന്ത്യയിലെ മുന്‍നിര വാഹന നിര്‍മാതാക്കളായ മാരുതി സുസുക്കി, ഹ്യുണ്ടായി, ടാറ്റ മോട്ടോഴ്‌സ്, മഹീന്ദ്ര, ഹോണ്ട കാര്‍സ്, കിയ മോട്ടോഴ്‌സ്, ടൊയോട്ട, ഫോര്‍ഡ്, ജീപ്പ് ഇന്ത്യ തുടങ്ങിയവര്‍ പ്ലാന്റുകള്‍ അടച്ചിടുമെന്ന് അറിയിച്ചിരുന്നു. ഹോണ്ട മോട്ടോര്‍ സൈക്കിള്‍, സുസുക്കി ടൂവീലര്‍, ബജാജ് ഓട്ടോ, ജാവ മോട്ടോര്‍ സൈക്കിള്‍ തുടങ്ങിയ ഇരുചക്ര വാഹനനിര്‍മാതാക്കളും പ്ലാന്റുകള്‍ അടച്ചിരിക്കുകയാണ്.

കഴിഞ്ഞ ഏതാനും മസങ്ങളായി കടുത്ത പ്രതിസന്ധിയാണ് വാഹന വിപണിയിലുള്ളത്. ഇതിനിടെ ഏപ്രില്‍ ഒന്ന് മുതല്‍ രാജ്യത്തിറങ്ങുന്ന വാഹനങ്ങളില്‍ ബിഎസ്-6 നിലവാരത്തിലുള്ള എന്‍ജിനുകള്‍ നല്‍കണമെന്ന് കേന്ദ്ര സര്‍ക്കാര്‍ നിര്‍ദേശവും നല്‍കിയിരുന്നു. ബിഎസ്-6 എന്‍ജിനുകളുടെ നിര്‍മാണത്തിനായി ഇന്ത്യയിലെ വാഹനനിര്‍മാതാക്കള്‍ 90,000 കോടി രൂപയുടെ നിക്ഷേപമാണ് നടത്തിയിട്ടുള്ളത്.